सम्झौता बिना जग्गा तथा जंगलमा डोजर चलाएको आरोप - स्थानीयको विरोध
सिन्धुपाल्चोक। लिसंखुपाखर गाउँपालिका–स्थित डाँसे गाउँको घुाम्बुल तेराङ्गा क्षेत्रमुनि निर्माण हुन लागेको चौरी खोला जलविद्युत् आयोजनाले स्थानीयसँग आवश्यक सहमति तथा सम्झौता नगरी डोजर प्रयोग गरेर जग्गा र जंगलमा क्षति पुर्याउने काम गरिरहेको भन्दै स्थानीयवासीले गम्भीर आपत्ति जनाएका छन्। स्थानीयका अनुसार आयोजनाले प्रभावित क्षेत्रका बासिन्दासँग उचित छलफल, सहमति तथा क्षतिपूर्ति सम्बन्धी स्पष्ट प्रक्रिया पूरा नगरी निर्माण कार्य अगाडि बढाएको आरोप लगाइएको छ। यस विषयमा डाँसे गाउँका युवाहरूले पटक–पटक सम्बन्धित कम्पनीलाई वार्तामा आउन र स्थानीयको माग सम्बोधन गर्न अनुरोध गरे पनि कम्पनी पक्षले बेवास्ता गर्दै आएको गुनासो गरिएको छ।
स्थानीय बासिन्दाहरूले आफ्नो पुर्खौंदेखिको जग्गा, वन क्षेत्र तथा प्राकृतिक स्रोतहरूमा असर पर्ने गरी कार्य भइरहेको भन्दै तत्काल निर्माण गतिविधि रोक्न र स्थानीय समुदायसँग औपचारिक संवाद गर्न माग गरेका छन्। यसैबीच आयोजनासँग सम्बन्धित विषयमा आर्थिक चलखेल राजनीतिक प्रभाव तथा अनियमितताको आशंका समेत स्थानीय तहमा उठ्न थालेको छ। केही स्थानीयले प्रभावशाली राजनीतिक व्यक्तित्व तथा समाजसेवीहरू मौन बसेको भन्दै प्रश्नसमेत उठाएका छन्। यद्यपि यी आरोपहरूको स्वतन्त्र पुष्टि भने हुन सकेको छैन। यस विषयमा डाँसे गाउँका युवा तथा वडा सदस्य Ribek Ghishing ले निरन्तर स्थानीय समुदायको आवाज उठाउँदै आएका छन्। स्थानीयका अनुसार उनले गाउँवासीको हक, अधिकार र मागलाई सम्बन्धित निकायसम्म पुर्याउन बारम्बार पहल गरिरहेका छन्।
स्थानीयवासीहरूले विकास निर्माणको विरोध नभई स्थानीयको अधिकार, सहमति, उचित क्षतिपूर्ति र वातावरणीय संरक्षण सुनिश्चित गर्दै मात्र आयोजना अगाडि बढाउनुपर्ने धारणा राखेका छन्। उनीहरूले सम्बन्धित कम्पनी, स्थानीय सरकार तथा सरोकारवाला निकायलाई तत्काल वार्ताको वातावरण सिर्जना गरी समस्या समाधान गर्न आग्रह गरेका छन्। समाचार स्रोत: कर्मा वाङ्गेल लामा पिपल घरे ग्रुप।
Comments
Post a Comment